Showing posts with label Arabic. Show all posts
Showing posts with label Arabic. Show all posts

22 September 2016

ستيكرز الحوت القاتل

واحد من اكتر المخلوقات المحببه ليا طول عمري هو الحوت القاتل، بحب كل حاجه في شكله ذكاءه جماله ، طول عمري كان واحد من احلامي اني اشوف واحد على الحقيقه.

حبي للحوت القاتل ابتدى من وانا صغيره لما شفت كارتون اسرار المحيط ، من ساعتها وانا بحب المخلوق ده.

الاسبوع ده و كتعبير عن حبي للحوت القاتل اخترت يكون هو طابع استيكر الاسبوع.



لو حابه تشوفي شكل المجموعه دي في المنظم بتاعي حتلاقيها  في حساب الانستجرام بتاعي Dodo_charms

متنسيش تشتركي  في الرسائل بتاعتي عشان تعرفي ايه الجديد على المدونة اول بأول.


08 September 2016

ستيكرز بطابع شاطئ البحر

ازيكم يا احبابي....


قد ايه نفسي اروح البحر اليومين دول بس مع الاسف لاني عايشه في الكويت فمجرد التفكير في الخروج من الباب بالنهار يعني ضربه شمس ، درجه الحراره اليومين دول من 45 الى 50 .

شكلي حمشي حالي بس بمجموعه ستيكرز بطابع البحر يمكن تخفف الحر شويه .

المره دي حبيت تكون مجموعه الاستيكرز خفيفه و مليانه صور و اشكال ليها علاقه بالبحر و شيلت الاستيكرز الخاصه بمهام اليوم .


متنسيش تشتركي  في الرسائل بتاعتي عشان تعرفي ايه الجديد على المدونة اول بأول، ولو حبيتي ممكن تتابعيني على الانستجرام وعليه كل اختراعاتي و تجهيزاتي الجديده.



01 September 2016

ستيكرز كيوت للمنظم

الاسبوع ده وقعت ايدي على شخصيات كيوت جدا و قلت لنفسي لازم اعمل مجموعه ستيكرز للمنظم بالشخصيات دي.




اخترت اللون الاصفر و الازرق كطابع للمجموعه دي و متقلقيش الاصفر واضح فالطباعه.

لو حابه تشوفي شكل المجموعه دي في المنظم بتاعي حتلاقيها  في حساب الانستجرام بتاعي Dodo_charms

25 August 2016

مجموعه ستيكرز للمنظم باللون الذهبي و الفيروزي

انا اعشق اللون الفيروزي و يا سلام بقى لو اتحط مع الذهبي.

و بما ان المنظم بتاعي عشقي فلازم اعملو حاجه بمجموعه الالوان دي.

متنسيش تشتركي  في الرسائل بتاعتي عشان تعرفي ايه الجديد على المدونة اول بأول، ولو حبيتي ممكن تتابعيني على الانستجرام وعليه كل اختراعاتي و تجهيزاتي الجديده.

18 August 2016

ستيكرز بخلفية الوان مائيه

الاسبوع ده كان اسبوع صعب و متعب جدا عشان لسه راجعه من السفر.

طبعا كان ورايا حجات كتيرة جدا عايزه تتعمل ولسته طويل في البلانر بتاعي و عشان اقدر اعمل كل الحجات المطلوبه مني كان لازم طبعا الجأ لعشقي للقهوه، و كنتيجه لحبي للقهوه مكنش ينفع يعدي اليوم منغير ما اعمل مجموعه ستيكرز للقهوه.

اخترت لمجموعه الستيكرز دي خلفيه الوان مائية  وكأضافه عملت كمان ستيكرز لتشجيعي على ممارسه الرياضه.

المجموعه دي بسيطه جدا بس طلعت حلوه و مختلفه.

زي كل مره كل المطلوب هو ورق ستيكرز او ورق عادي، اطبعي الملف و قصي و استمتعي.



يا رب تستمتعي بالمجموعه دي ولو في اي تعليق او افكار يا ريت تسيبي تعليق تحت او على حسابي على الانستجرام Dodo_charms.

لتحميل الستيكرز Download.

متنسيش تشتركي في رسائل الايميل عشان يوصلك الجديد اول بأول.

11 August 2016

مجموعه ستيكرز للبلانر باللون الوردي و الفيروزي

لونين حلوين جدا مع بعض مش صح، حسيتهم لازم يكونو مع بعض عشان كده الاسبوع ده حيكون باللون الوردي و الفيروزي و يارب تعجبكم.




لو عندك اي اقتراحات او طلبات يا ريت تسيبي تعليق تحت و حكون مبسوطه جدا بيه.

ولو حابه تشوفي شكل الاستيكرز على الحقيقه في مدونتي الصور حتلاقيها على حساب الانستجرام بتاعي Dodo_charms.

04 August 2016

فواصل البوكيمون للمنظم

ازيكم يا حلويين، اخيرا رجعت من الاجازه و الحمد لله كانت اجازه حلوه في فترة الاجازه نزلت بقى لعبه Pokemon go و ما ادراك ما لعبه بوكيمون بالنسبه ليا.

بدأ بقى الهوس ، ايوه انا مهوسه باللعبه و بأي حاجه ليها علاقه بالبوكيمون وعشان كده كل حاجه في البلانر بتاعي بقت بقدرة قادر بوكيمون ( فواصل ، مشابك ورق ، ستيكرز ).

انا كنت نشرت قبل كده مجموعه ستيكرز البوكيمون ، النهرده بقى حشارك معكم فواصل المنظم بطابع البوكيمون و دي كنت حطتها على الانستجرام من كام يوم Dodo_charms .


عشان اعمل الفواصل اخترت مجموعه من الخلفيات لصور بوكيمونات انا بحبها ( ايوه انا بحب البوكيمونات كلها بس ليا انواع مفضله ) و اخترت مجموعه صور منفصله للبوكيمونات و عكستهم بعد كده قصيتهم و جمعتهم مع بعض عشان يبقى شكلهم كده.


و ده شكلهم من فوق .


و الحمد لله انا كنت لسه شاريه جهاز تغليف فاستخدمته في تغليف الفواصل بعد قصها ، لكن ممكن جدا يستخدمو من غير تغليف او باستخدام الجلاد الخاص بالمدارس زي ما تحب .

بالنسبه لمسطرة بيكاتشو لو عايزه تعرفي ازاي عملتها سيبى تعليق تحت و حكون سعيده بمشاركتها معاكم.

اما بقى مشبك ورق بيكاتشو فده عملته بنفس الطريقة المشروحه في التدوينه دي :افكار لتزيين المنظم (paper clips - sticky notes)

ممكن كمان تشوفي تدوينه فواصل مولانج لشرح اكتر لطريقه عمل الفواصل فواصل للمنظم

و دلوقتي اللينك بتاع فواصل البوكيمون Pokemon planner dividers

معلش حاجه اخيره الفواصل دي متزبطه على مقاس A6 او بيرسونال لو حابه تستخدميها لمقاس تاني كل المطلوب بس تزبيط مقاس الصور و طريقه التزبيط مشروحه في تدوينه فواصل مولانج.

يا رب تعجبك الفواصل و متنسيش تشتركي في نشرة الايميل بتاعتي.



26 July 2016

ستيكرز للمنظم بطابع الفيل الظريف

حبيت الاسبوع ده مجموعه صور كيوت لفيل ظريف فاخترتها تكون طابع ستيكرز الاسبوع ده.

كل المطلوب هو ورق و طابعه و مش شرط ورق ستيكرز ورق عادي حينفع و تلزقيه على المنظم.

يا رب تعجبكم.


شفتي كيوت جدا ازاي عموما لو في اي افكاراو مواضيع عندك رغبه تشوفيها على المدونه يا ريت تسيبي تعليق تحت، و متنسيش تشتركي بالايميل بتاعك عشان تجيلك ايميلات بكل مجموعات الاستيكرات الجديده و المطبوعات المجانيه.

و متنسيش تتابعينى على الانستجرام عشان تعرفي انا بعمل ايه و بجهز لكم  ايه . Dodo_charms

23 July 2016

ستيكرز للمنظم بطابع الجليتر

حبيت الاسبوع ده يكون منظمي لماع و مليان جليتر فأخترت ستيكرز بطابع الجليتر.

كل المطلوب هو ورق و طابعه و مش شرط ورق ستيكرز ورق عادي حينفع و تلزقيه على المنظم.

يا رب تعجبكم.




لو في اي افكاراو مواضيع عندكم رغبه تشوفوها على المدونه يا ريت تسيبو تعليق تحت، و متنسوش تشتركو بالايميل بتاعكم عشان تجيلكم ايميلات بكل مجموعات الاستيكرات الجديده و المطبوعات المجانيه.

و متنسوش تتابعونى على الانستجرام عشان تعرفو انا بعمل ايه و بجهز لكم  ايه . Dodo_charms

19 July 2016

اسبوع على صفحتين للمنظم بطابع رقيق

حبيت الاسبوع ده اعمل حاجه كده رقيقه و لطيفه للمنظم بتاعي فعملت الصفحات الاسبوعيه على صفحتين و طلعت كده:



في مكان طبعا لكتابه الشهر ومكان لكاتبه تاريخ اليوم، حبيت اسيبها فاضيه كده عشان تكون اسهل في الاستخدام.

و ده شكلها في المنظم بتاعي حاجه كده رقيقه و ناعمه:



و زينتها بقى باستخدام مجموعه الاستيكرز الباستل ودي كنت حطيتها هنا على المدونه قبل كده.




يا رب تعجبكم و تستمتعو بيها وزي ما انا استمتعت .

16 July 2016

مسطره للمنظم

من اكتر الحاجات الى بتخلى المنظم مريح و سهل في الاستخدام هى المسطره لانى بستخدمها كعلامه للاسبوع الحالي هي مش مسطره بمعنى الكلمه الصراحه بس هي اسمها كده في عالم المنظمات، عموما مش ده المهم.

المهم هو لينك لشكلها و مقاسها حتطبعيه على ورقه عاده و تستخدميه كمرجع ليها و تختاري بقى اي صوره او خلفيه تعجبك من الانترنت ليها او لو عندك ورق ملون سميك شويه زي ما تحبي الاختيار ليكي.

وده اللينك :




الكبيرة لمقاس A5 و الصغيره للمقاس الشخصي.

انا بقى عدلت عليها طبعا كالعاده و حطيت مكان كلمة Today شعار المدونه بتاعتي وده شكلها.






يا ريت اشوف ابداعاتكم سواء هنا في المدونه او ممكن تعملولي تاج على الانستجرام Dodo_charms.

11 July 2016

ستيكرز للمنظم بطابع البوكيمون

مسلسل بوكيمون كان واحد من احلى المسلسلات في طفولتي (الحق يقال انا لسه بتفرج عليه لحد دلوقتي) في الحقيقه انا مهووسه بالانمي و بتابع اكتر من مسلسل دلوقتي واعتقد ده حيبان على مجموعه الاستيكرز الجايه.

عموما نرجع للاسبوع ده و اتفضلي مجموعه البوكيمون.




متنسيش تشوفي حساب الانستجرام بتاعي عشان تعرفي ايه المجموعات الجايه.

و ممكن تشتركي في رسائل الايميل عشان تعرفي ايه الجديد على المدونة.

07 July 2016

ستيكرز النجوم الصفراء

الاسبوع ده اسبوع مواجه بيني و بين اللون الاصفر.

طول عمري مبحبش اللون الاصفر مش عارفه ليه، يعني مفيش سبب معين يخليني اكره اللون ده بس عمري ما حبيتو و عمري مكان عندي هدوم او اي حاجه لونها اصفر.

دانا حتى زعلت من ماما لانها مصوراني و انا صغيره بفستان اصفر(شوفتو عبط اكتر من كده).

عموما مع تقدمي بالعمر بدأت انضج شويه و ابتديت ادخل اللون حياتي و عشان كده الاسبوع ده في منظمي حيكون اصفر.

اقدملكم مجموعه النجوم الصفراء لمواجه كرهي للون الاصفر .




و ده شكلها في منظمي يا رب تعجبكم .


04 July 2016

قائمة مهام الباندا للمنظم

انا اعشق الباندا بالنسبه ليا ده حيوان كيوت و لطيف جدا و لو شفت اي حاجه عليها باندا بتهبل عليها.

و بما ان المنظم بتاعي عشقي فلازم اعملو حاجه عليها باندا طبعا، الاسبوع ده عملت مجموعه ستيكرز للمهام وعليها الباندا حبيبي.

متنسوش تشتركو في الرسائل بتاعتي عشان تعرفو ايه الجديد على المدونة اول بأول، ولو حبيتو ممكن تتابعوني على الانستجرام وعليه كل اختراعاتي و تجهيزاتي الجديده.


30 June 2016

مجموعه ستيكرز زهرة الكرز للمنظم

مين مبيحبش زهره الكرز، بالنسبه ليا انا بمووت في الشجرة دي و بحب وردها جدا حاجه كده رقيقه و مريحه جدا للاعصاب.

مجموعه الاسبوع ده من ستيكرز المنظم حتكون حاجه رقيقه خالص و مليانه ورود شجرة الكرز.



المره دي خليت checklist مختلفه شويه خليتها عباره عن ورود كرز .

لو في اي افكاراو مواضيع عندك رغبه تشوفيها على المدونه يا ريت تسيبي تعليق تحت، و متنسيش تشتركي بالايميل بتاعك عشان تجيلك ايميلات بكل مجموعات الاستيكرات الجديده و المطبوعات المجانيه.

و ياريت تتابعينى على الانستجرام عشان تعرفي انا بعمل ايه و بجهز لكم  ايه . Dodo_charms


28 June 2016

مشبك ورق بطوط بالصلصال الحراري

انا عارفه اني معملتش اي تدوينه عن الصلصال من زمان جدا بس بصراحه مشكلتي على طول كانت الاضاءه في المكان الي بشتغل فيه، الصور مكنتش بتطلع زي ما انا عايزه.

عموما قررت اجرب و اشوف رد فعلك انت على الصور، لو عجبتك وحسيتي انها مفيده يا ريت تسيبي تعليق تحت عشان اعرف اكمل ولا لأ.

النهرده حعمل ان شاء الله مشبك ورق عليه بطوط.



نبدأ بقى:

حنعمل كوره من الصلصال الابيض و نبططها شويه


بعد كده حنقطع حته من تحت زي الصوره


ونعمل فيها فتحه عشان ندخل فيها مشبك الورق



نعمل كورتين صغيرين من الصلصال الاسود للعينين



المنقار حنعملو من الصلصال الاصفر



و الفيونكه من الصلصال الاحمر دي عباره عن كورتين جنب بعض مبططين شويه و فوقيهم في النص كوره تانيه اصغر



الخدود كورتين بينك صغيرين


عشان نعمل الطاقيه حنفرد شويه صلصال اسود ونقطعو زي الصوره


و بعدين نحط فوقهم كوره من الصلصال الازرق الفاتح زي الصوره



نخبزهم بقى في الفرن حسب نوع الصلصال و بكده يكون عندنا مشبك ورق جميل عليه بطوط.

لو عجبك الشرح يا ريت تسيبي تعليق تحت.

و لو حابه ممكن تتابعيني على الانستجرام عشان تعرفي انا بعمل ايه.

23 June 2016

ستيكرز بطابق القط Pusheen

واحده من الشخصيات الكيوت في عالم الانمي الكوري حاجه كده مدوره و جميله ايوه انا بتكلم عن Pusheen و عشان انا بحبها جدا مجموعه ستيكرز الاسبوع ده حتكون عنها .

يلا بينا:




لو في اي افكاراو مواضيع عندك رغبه تشوفيها على المدونه يا ريت تسيبي تعليق تحت، و متنسيش تشتركي بالايميل بتاعك عشان تجيلك ايميلات بكل مجموعات الاستيكرات الجديده و المطبوعات المجانيه.

و متنسيش تتابعينى على الانستجرام عشان تعرفي انا بعمل ايه و بجهز لكم  ايه . Dodo_charms

16 June 2016

مجموعه ستيكرات للمنظم بطابع زهرة الاقحوان

الاسبوع ده اخترت زهرة الاقحوان عشان تكون طابع زينه المنظم بتاعي حسيتها مناسبه للجو.

اتمنى تعجبكم و تستمتعو بيها :



حبيت تكون مجموعه بسيطه و رقيقه و يارب تعجبكم .

لو في اي افكاراو مواضيع عندكم رغبه تشوفوها على المدونه يا ريت تسيبو تعليق تحت، و متنسوش تشتركو بالايميل بتاعكم عشان تجيلكم ايميلات بكل مجموعات الاستيكرات الجديده و المطبوعات المجانيه.

و متنسوش تتابعونى على الانستجرام عشان تعرفو انا بعمل ايه و بجهز لكم  ايه . Dodo_charms

09 June 2016

Shaker Dashboard

حبيت اشارككم داش بورد بفكر مختلف شويه.



كنت شفت اشكال مختلفه ليه على الانستجرام و حبيت اعمل واحد لنفسي.



حنحتاج عشان نعمله:

قاطع 

لوح تقطيع



مغلف بلاستيك شفاف

جليتر



اداه لحام او بديل لها انا استخدمت الاداه دي ( انا معرفش اسمها ايه الصراحه بس هي من ادوات الخياطه)



بدأت بأني طبعت الصوره و الشريط الجانبي و ده مهم لانه حيكون فيه الفتحات عشان تتحط في المنظم.


بعد كده قصيتهم وقصيت المغلف البلاستيك على مقاس المنظم بتاعي.



حنحط الصور في المغلف البلاستك زي الصوره و نستخدم اداه اللحام بعد تسخينها في اغلاق كل الاطراف إلا الطرف الاعلى عشان نعرف نضيف الجليتر.
مهم نتأكد من اغلاق الطرف الموجود بين الصورتين عشان الجليتر ميقعش من فتحات المنظم.

نضيف بعد كده الجليتر:



ونقفل الطرف الاعلى، و بكده نقدر نستمتع ب shaker dashboard للمنظم.