أهلا بكم مرة اخرى ...
زي ما وعدتكم في التدوينة الماضية النهرده حنتكلم عن اول منظم عملته وطريقة صنعه.
كان نفسي جدا اعمل واحد حلو زي المنظمات الموجوده على الانترنت وعلشان كده اخترت كشكول سلك غلافه عجبني و قررت اظبطه.
و قبل ما ابدأ اشتغل على المنظم بدأت ادور الاول على مطبوعات جميلة و على اقسام انا حابه تكون في المنظم.
واخترت يكون فيه :
تقويم شهري فيه كل شهر على صفحتين علشان اكتب فيه المواعيد العامة زي (موعد طبيب ، فيلم حابه اشوفو ، ... )
تقويم اسبوعي واستخدامت الاسبوع على صفحتين علشان احط مواعيد كل يوم و حجات حابه اعملها الاسبوع ده.
قائمة رغباتي و دي قسمتها حاجات نفسي فيها لنفسي و حجات حابه اجيبها للبيت ، حطيت فيها كمان كتب و افلام نفسي اقراها و اشوفها.
قسم المصاريف و الميزانية الشهرية.
قسم لتدوين اي خواطر او افكار بالنسبة للاشغال اليدوية .
بالنسبة للقسم الشهري جبت التقويم بتاعه من على الانترنت ( دورت على monthly planner free printable ) و فيه اشكال كتير جدا اختاري منها المناسب ليكي .
اما بقى الاسبوعي ملقتش حاجه عجبتني على الانترنت ( فيه بفلوس بس انا كنت عايزه حاجه بشكل معين واطبعها في البيت بنفسي ) فاستخدمت برنامج word و عملت اكتر من تصميم و طبعتهم بنفسي.
ححط لينك للتصاميم دي في اخر التدوينة لاي حد حابب يستخدمها.
باقي الاقسام ممكن تدوري على اشكال عاجباك على الانترنت زي ما عملت او تصممي الشكل زي ما تحبي انا كنت بختار صوره عاجباني و اعمل على word صفحه بسطور بس و ازينها بالصور ، وبردو حطيت لينك لحجات انا عملاها .
عملت كمان لكل قسم tag عشان اعرف اوصلو بسرعه بدل ما ادور عليه .
بالنسبة للمنظم بقى انا كنت حابه يكون فيه جيوب عشان احط فيها زينة و الاستيكرز فعملت جيوب في الجنب و الطريقة :
اخترت تصميم عجبني من الانترنت و طبعته على ورقه عاديه و لزقتها على ورق مقوى و بعدين قصيت فيها جيوب بالشكل حبيته و لزقتها على الكشكول من جوه من زي في الصورة.
الاسود هو مكان قطع الجيوب و الاصفر مكان الصمغ .
اهم حاجه متقصش الجيوب للاخر عشان الورقه تبقى ماسكه نفسها .
لتجميع المنظم بقى ده فيديو بيوضح الطريقه بالظبط .
دي المطبوعات زي ما وعدتكم ، كلها انا مصمماها لمقاس ورق A5 و ده نص الورق العادي .
طبعا الاقسام و شكل المطبوعات بيعتمد على الذوق الشخصي اختاري حاجه بتحبيها و بسهوله و تكلفه قليله حيبقى عندك منظم جميل.
التزيين كنت بستخدم فيه ستيكرز انا طبعاها من الانترنت و حنتكلم عنها في تدوينه قادمة ان شاء الله .
كمان في تدوينة قادمه حنتكلم عن طريقه عمل ورق النوت ( sticky notes ) و طريقة عمل ( paper clips ) .
اتمنى اكون افدتكم .
No comments:
Post a Comment