اهلا يا اصحابي ....
نكمل بقى تزيين المنظم و ندخل على مشابك الورق او paper clips الاول.
التزيين باستخدام مشابك الورق باب مفتوح ملوش اخر (حلوه دي) بس دي حقيقه فعلا لانك ممكن تستخدمي اي صور انتى عايزاها و تحطيها على مشابك الورق و تدااااا بقى عندك اختراع تحفه تزيني بيه المنظم او تستخدميه كعلامه لصفحه معينه في المنظم.
انا مثلا كنت حابه احط شخصيات ديزني و عشان في موجه رهيبه من خط انتاج جديد لديزني اسمه Tsum Tsum ودي شخصيات ديزني بس معموله بطريقه جديده زي كده :
اخترت من التصميم ده شخصيتين عجبوني (اريل و دمبو) :
و طبعتهم بحجم مناسب على ورق عادي وقصتهم بعد كده ليكي الاختيار بين التجليد بجلاد شفاف زي بتاع المدارس او لو عندك مكينه تغليف زي دي ممكن تستخدميها.
انا مكنش عندي المكينه بس كنت حابه طريقة التغليف دي لانها امتن فجبت ورق التغليف الخاص بيها و استخدمت حيله صغيره (انتو عرفني و اختراعاتي) دلوقتي المكينه دي وظيفتها حراره و ضغط صح انا بقى استخدمت اله الكوي العاديه وحطيت قطعه قماش بين الورق و بينها و بكده بقى عندي ورق متغلف زي ما انا عايزه.
بعد كده قصيته و لزقته على مشابك الورق (ممكن تستخدمي مسدس الشمع او اي نوع غراء موجود).
وده شكلهم بعدما خلصت :
تحفه صح، ممكن بقى تستخدمي اي صور او افكار انتى عيزاها خيالك هو الحدود (كلام كبير قوي).
ثاني طريقة تزيين بقي هي ورق النوت (sticky notes) لو دورتي على الانترنت حتلاقي كميه اشكال وهميه من النوت و مع الاسف صعب تلاقي حجات زي كده في المكتبات (الموجود ديما نوت عاديه ممله) صحبتكم مش حتسكت طبعا و عشان انا بحب اعمل كل حاجه على مزاجي دعبست لحد ما طلعت بطريقه اعملهم بيها في البيت و زي ما انا عايزه، و ده انتاجي.
الطريقه بقى يا رغايه :)
اوك الطريقه بسيطه جدا فوق ما تتخيلو، اخترت الصور من الانترنت او عملتها بنفسي و زبط حجمها على word زي ما قلنا في التدوينه الماضيه، عملت اكتر من نسخه :
بعد كده طبعتهم و قصيتهم وعلشان يبقو زي النوت الموجوده في المكتبات احتجت نوع صمغ اسمه double tape ده موجوده في المكتبات بس اتأكدي ان النوع يكون repositionable عشان تقدري تشيليه و تحطيه في اي مكان من غير ما يقطع الورق.
حطيت الصمغ من فوق على الورق من الخلف و رصيته فوق بعضه زي النوت، وبكده بقى عندي نوت جميله و كيوت زي الموجوده بره بالظبط (او احلى عشان انا عملها بنفسي).
يلا طلعو الابداعات و ممكن تورني الصور على الانستجرام dodo_charms# و متنسوش تعملولي تاج @dodo_charms .
No comments:
Post a Comment